ᐳᑦᑕᐅᑏᑦ ᑲᑎᒪᓂᕐᔪᐊᖓᓂ ᓄᓇᕕᒻᒥᐅᑦ ᑲᑎᖃᑎᒌᑉᐳᑦ

ᐃᓕᕐᕈᓯᓕᕆᓂᖅ ᐊᒻᒪᓗ ᐃᒻᒥᓄᐊᖓᔪᓂᒃ ᐱᕙᓪᓕᐊᓂᖅ (ᑲᑎᒪᓂᐊᕈᓯᖃᕐᑎᓯᔪᖅ: ᐋᓂ ᓄᓗᑭ)
ᐃᓕᕐᕈᓯᓕᕆᓂᖅ ᐊᒻᒪᓗ ᐃᒻᒥᓄᐊᖓᔪᓂᒃ ᐱᕙᓪᓕᐊᓂᖅ (ᑲᑎᒪᓂᐊᕈᓯᖃᕐᑎᓯᔪᖅ: ᐋᓂ ᓄᓗᑭ)

ᐳᕕᕐᓂᑐᒥ, ᐅᒃᑑᐱᕆ 13, 2015-ᒥ – ᐊᓪᓕᖏᓱᖓᕐᑐᓂ ᐅᓐᓄᓴᒃᑯᑦ ᐅᒃᑯᐊᑕᐅᓂᖃᕐᓂᖁᖅ ᓯᕗᓪᓕᐹᑦᓯᐊᒍᑦᓱᓂ ᓄᓇᓕᓕᒫᓂᒃ ᑭᒡᒐᑐᕐᑐᑦ ᐃᓅᓯᕐᒥᒃ ᑭᐱᓯᑦᑌᓕᒋᐊᖃᕐᓂᒧᑦ ᐊᒻᒪᓗ ᒪᒥᓴᕐᓂᒧᑦ ᑲᑎᒪᓂᕐᔪᐊᕆᓚᐅᕐᑕᖓᑦ, ᑲᑎᕕᐅᓚᐅᕐᑐᖅ ᓄᓇᕕᒻᒥᐅᓄᑦ ᑕᒪᑐᒥᖓ ᐱᒻᒪᕆᐊᓗᒻᒥᒃ ᐅᖃᐅᓯᖃᖃᑦᑕᓚᐅᕐᑐᓄᑦ ᐱᓇᓱᖃᑎᒌᒍᑎᒋᑦᓱᒍᓗ ᓴᐳᑦᔨᖃᑎᒌᒋᐊᓪᓚᓂᐊᕐᓂᒥᒃ. ᑲᑎᒪᕕᖓᑦ ᐃᑉᐱᓇᖃᑦᑕᓚᐅᕐᑐᖅ ᓄᒃᑭᓇᕐᑐᓯᐊᒍᒋᐊᖓ ᐊᑕᐅᓯᐅᓚᕿᖓᕕᐅᒋᐊᖓᓗ, ᑕᕝᕙᓂ ᐱᓇᓱᐊᕈᓯᕐᒥ ᐱᓇᓱᐊᕐᑕᐅᓯᐊᕐᓂᕕᓂᖓᓄᑦ ᑕᒪᑐᒪ.

ᐱᓇᓱᐊᕈᓯᓕᒫᒥ ᑲᑎᒪᓂᕐᔪᐊᓕᐊᕐᓯᒪᖃᑦᑕᓚᐅᕐᖁᑦ 100 ᐅᖓᑖᓅᕐᑐᑦ ᐊᑦᔨᒌᖕᖏᑐᓄᑦ ᑲᑎᒪᓂᐊᕈᓯᓕᐊᖃᑦᑕᑎᓪᓗᒋᑦ ᐱᒋᐅᕐᓴᑎᑕᐅᑦᓱᑎᒃ ᐃᑲᔪᕈᒪᓂᕐᓴᐅᖃᑦᑕᓂᐊᕐᒪᑕ, ᐊᑐᐃᓐᓇᐅᓂᐊᕐᒪᑕ ᑲᒪᒍᓐᓇᓂᐊᕐᒪᑕᓗ ᐃᓅᓯᕐᒥᓂᒃ ᑭᐱᓯᒋᐊᒥᒃ ᐃᓱᒪᓲᓂᒃ, ᑐᑭᓯᓕᐅᒥᑦᓱᑎᓪᓗ ᖁᐊᕐᓵᖓᓇᕐᑐᑰᕈᑕᐅᓯᒪᔪᓄᑦ ᑌᒪᖕᖓᓂᐊᓗᒃ ᓱᕐᕋᑕᐅᓯᒪᐅᑎᖏᓐᓂᒃ ᐃᓄᐃᑦ, ᑐᑭᓯᓕᐅᒥᑦᓱᑎᓪᓗ ᓴᓇᕐᕈᑎᑦᓴᖃᕐᓂᒥᓂᒃ ᒪᒥᓴᕐᕕᓴᖃᕐᓂᒥᓂᓪᓗ. “ᑖᓐᓇ ᑲᑎᒪᓂᕐᔪᐊᖅ ᐊᑯᓂᐊᓗᒃ ᑭᖕᖒᒪᒋᔭᐅᓯᒪᓕᕐᑐᖅ ᐃᓅᑦᓱᑕᓗ, ᑖᑦᓱᒥᖓ ᑲᑎᒪᓂᕐᔪᐊᒥᒃ ᐊᑑᑎᑎᑦᓯᓕᕐᖁᒍᑦ,” ᕚᓗᕆ ᓛᒃ ᐅᖃᕐᑐᕕᓂᖅ, ᓄᓇᓕᓕᒫᓂ ᐃᓅᓯᕐᒥᒃ ᑭᐱᓯᑦᑌᓕᒍᑎᑦᓴᓕᕆᓂᕐᒧᑦ ᑲᑎᒪᔨᓄᑦ ᐊᖓᔪᕐᖄᖅ. “ᑕᕝᕙᓂ ᐱᓇᓱᐊᕈᓯᕐᒥᒃ ᓄᒃᑭᕆᐊᕐᓇᑑᓚᐅᕐᖁᖅ ᐃᓚᐅᔪᓕᒫᓄᑦ ᖃᐅᔨᒪᑦᓱᖓᓗ ᐃᓘᓐᓇᑕ ᐱᓇᓱᖃᑎᒌᒍᑎᖃᓚᖓᑦᓱᑕ ᑖᑦᓱᒥᖓᑦᓭᓇᖅ ᑐᕌᒐᖃᕐᓂᒥᒃ ᓄᓇᕕᒻᒥ ᐃᑯᓪᓚᑎᑦᓯᒋᐊᕐᓂᒧᑦ ᐃᓅᓯᕐᒥᒃ ᑭᐱᓯᑐᐃᓐᓇᓂᕐᒥᒃ.” ᖃᓄᐃᖕᖏᓯᐊᕈᑎᑦᓴᓂᒃ ᑕᑯᒐᑦᓴᖃᕐᑎᓯᓂᖅ ᐱᕕᑦᓴᓯᐊᒍᓚᐅᕐᒥᔪᖅ ᐱᓇᓱᕝᕖᑦ ᓄᓇᕕᒻᒥ ᓱᓇᓂᒃ ᐱᒍᑦᔨᐅᑎᑦᓴᖃᕐᒪᖔᕐᒥᒃ ᑕᑯᔭᐅᑎᑦᓯᒍᓐᓇᓚᐅᕐᒪᑕ.

ᐃᑲᔪᕐᓯᔭᐅᒻᒪᕆᓚᐅᕐᑐᖅ ᓴᐳᑦᔭᐅᓱᓂᓗ ᐳᑦᑐᐅᑏᑦ ᑲᑎᒪᓂᕐᔪᐊᖓ ᓄᓇᓕᒻᒥ ᐊᑐᐃᓐᓇᕈᕐᑎᔨᓄᑦ ᐳᕕᕐᓂᑐᒥᐅᓄᓪᓗ. ᐅᓐᓄᓯᐅᕈᑎᑦᓭᑦ ᐊᑐᐃᓐᓇᐅᑎᑕᐅᖃᑦᑕᓚᐅᕐᑐᑦ ᐱᓇᓱᐊᕈᓯᓕᒫᒥ, ᑲᑎᒪᒋᐊᕐᑐᓯᒪᔪᑦ ᐳᕕᕐᓂᑐᒥᐅᓪᓗ ᐱᕕᑦᓴᖃᕐᑎᑕᐅᑎᓪᓗᒋᑦ ᓂᒃᑯᓕᒋᐅᕐᓴᓂᕐᒥᒃ, ᓄᑮᓯᕌᑦᓯᐊᕈᓐᓇᓂᕐᒥᒃ, ᑕᙯᕐᓯᓯᐊᕈᓐᓇᓂᕐᒥᓗ. ᓄᓇᒥ ᐆᒪᒐᓱᐊᕈᓐᓇᓂᕐᒥᒃ ᐱᒋᐅᕐᓴᑎᑕᐅᓐᓂᒥᔪᑦ ᖃᕐᒪᒦᑦᓱᑎᒃ ᐊᕐᓀᓗ ᐅᓂᒃᑳᓯᐅᖃᑎᒌᓐᓂᒥᔪᑦ ᖃᕐᒪᓕᐊᕕᓂᕐᒥ ᐳᕕᕐᓂᑐᕐᒥᐅᓄᑦ ᑲᑎᒪᓂᕐᔪᐊᖃᕐᓂᖓᓂ ᐊᑐᕐᑐᓴᐅᑎᓪᓗᒍ, ᑲᑎᑦᑕᕕᑦᓴᐅᓱᓂ ᐱᐅᓯᐅᓯᒪᔪᓂᒃ ᐅᖄᕕᑦᓴᐅᑎᓪᓗᒍ ᐃᒫᙰᕆᐊᕈᑎᓂᓪᓗ. “ᑖᓐᓇ ᑲᑎᒪᓂᕐᔪᐊᖅ ᓈᒻᒪᓈᕐᓯᒪᑦᓯᐊᑐᕕᓂᖅ ᐳᕕᕐᓂᑐᒥᐅᓄᑦ ᑕᒐᑕᒐ ᐊᑑᑎᔭᐅᓂᖓ,” ᐅᖃᕐᑐᖅ ᒣᓇ ᐴᓐ, ᐊᖓᔪᕐᖄᕆᔭᐅᔪᖅ ᐃᑯᓪᓚᑎᑦᓯᒐᓱᐊᕐᓂᒧᑦ ᖃᐅᔨᒪᔭᐅᑎᑦᓯᓂᕐᒧᓗ ᐱᓇᓱᑦᑕᐅᔪᓂᒃ ᐃᓅᓕᑦᓯᕕᒻᒥ ᐋᓐᓂᐊᕕᒻᒥ ᐊᒻᒪᓗ ᐊᑕᐅᑦᓯᑰᕐᑎᓯᔨᐅᑦᓱᓂ ᓄᓇᓕᒻᒥ ᐊᑐᐃᓐᓇᕈᕐᑎᔨᓄᑦ. “ᐊᑑᑎᓚᐅᕐᑐᖅ ᑭᖑᓂᓪᓗᐊᓯᐊᖓᓂ ᑕᕐᕿᓕᒫᒥ ᐃᒥᐊᓗᖃᕐᓂᖅ ᓄᓇᓕᒻᒥ ᓄᕐᖃᖓᑎᑕᐅᕋᑖᕐᖃᒥᐅᑎᓪᓗᒍ, ᐱᕕᑦᓴᖃᕉᑕᕆᑎᓪᓗᒋᑦ ᐃᓄᐃᑦ ᐃᓅᓯᕐᒥᓂᒃ ᑕᑯᒋᐊᑦᓯᐊᕈᓐᓇᓂᕐᒥᒃ ᓂᕆᐅᒋᔭᑦᓴᓯᐊᓂᒃ ᐃᓱᒪᑦᓴᓯᐅᕈᑎᖃᑦᓯᐊᓗᑎᒃ, ᑌᒣᒻᒪᑦ ᑖᓐᓇ ᑲᑎᒪᓂᕐᔪᐊᖅ ᓈᒻᒪᓈᕐᓯᒪᑦᓯᐊᓂᕐᖁᖅ.

ᑖᓐᓇ ᑲᑎᒪᓂᕐᔪᐊᖅ ᑲᔪᓯᒍᓐᓇᓯᓯᒪᔪᖅ ᑲᑐᑦᔮᕆᔭᐅᑦᓱᓂ ᓄᓇᕕᒻᒥ ᐱᓇᓱᖃᑎᒌᑦᑐᓄᑦ ᓄᓇᓕᓕᒫᓂ ᐃᓅᓯᕐᒥᒃ ᑭᐱᓯᑦᑌᓕᒍᑎᑦᓴᓕᕆᓂᕐᒧᑦ ᑲᑎᒪᔨᓄᑦ, ᓄᐃᑕᐅᓯᒪᔪᓄᑦ ᐃᓗᓯᓕᕆᓂᕐᒥ ᐱᒍᑦᔨᐅᑎᓂᒃ ᕿᒥᕐᕈᔨᓄᑦ (www.ipqnunavik.com). ᑭᒡᒐᑐᕐᓱᒋᑦ, ᓄᓇᓕᓕᒫᓂ ᐃᓅᓯᕐᒥᒃ ᑭᐱᓯᑦᑌᓕᒍᑎᑦᓴᓕᕆᓂᕐᒧᑦ ᑲᑎᒪᔩᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓇᑯᕐᒦᐳᑦ ᐳᕕᕐᓂᑐᒥᐅᑦ ᑲᑎᒪᔨᖏᓐᓂᒃ, ᐃᓅᓕᑦᓯᕕᒻᒥᒃ ᐋᓐᓂᐊᕕᒻᒥᒃ, ᐃᒍᐊᕐᓯᕕᒻᒥᒃ ᐃᓕᓴᕐᕕᒥᒃ ᐊᒻᒪᓗ ᐃᓄᒻᒪᕇᑦ ᐃᓕᓴᕐᕕᖓᓂᒃ ᐳᕕᕐᓂᑐᒥ, ᐃᓄᐃᓪᓗ ᖃᖓᑦᑕᔫᖁᑎᖏᓐᓂᒃ ᐃᑲᔪᕐᓯᒪᓚᐅᕐᒪᑕ ᑲᑎᒪᓂᕐᔪᐊᖃᕐᓂᖓᓂ.

ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓇᐅᓕᒫᓂᒃ ᐱᒍᑦᔨᕕᐅᕗᖅ ᓄᐃᑕᐅᓯᒪᑦᓱᓂ 1978-ᒥ ᔦᒥᓯ ᐯᒥ ᑯᐯᓪᓗ ᑕᕐᕋᖓᓂ ᐊᖏᖃᑎᒌᓐᓂᒧᑦ. ᑲᒪᒋᔭᑦᓴᖃᕐᓱᓂ ᓄᓇᒥᒃ ᑕᕐᕋᖓᓃᑦᑐᒥᒃ 55 ᐃᑳᖓᔫᑉ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔭᐅᒍᑎᓂᒃ ᐱᕕᑦᓴᖃᕐᑎᓯᓂᒃᑯᑦ ᖁᓕᓪᓗ ᓯᑕᒪᓪᓗᓂ ᓄᓇᓕᒻᒥᐅᓂᒃ.

– 30 –

ᑐᓴᕋᑦᓴᓖᑦ:
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ
ᐸᕐᓀᓂᕐᓄᑦ ᐱᔭᑦᓴᓕᕆᓂᕐᓄᓗ ᐊᓪᓚᕕᒃ

ᑐᓴᐅᒪᑎᑦᓯᔪᖅ:
ᒥᐊᕆᑎᑦ ᑯᕆᕕᓐ
ᑐᓴᕋᑦᓴᓂᐊᕐᑎ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ
819 964-2222, ᐊᓪᓚᕕᖓ 275

Read the news release

 

 

Facebooktwittergoogle_plusmailFacebooktwittergoogle_plusmail

ᐅᖃᐅᓯᑦᓴᑎᑦ ᑭᐅᒍᑎᑦᓴᑎᓪᓘᓃᑦ ᒫᓂ ᐊᒡᓚᓗᒋᑦ

ᖃᕆᑕᐅᔭᒃᑯᑦ ᑐᕌᒍᑎᑎᑦ ᓄᐃᑕᑎᑕᐅᓚᖓᙱᑐᑦ. ᐊᒡᓚᕕᐅᓯᒪᓪᓗᑐᕆᐊᖃᕐᓂᖏᑦ ᓇᓗᓀᕐᑕᐅᓯᒪᒍᑎᓖᑦ ᐃᒣᓕᖓᔪᒧᑦ •