ᐃᓱᒪᒃᑯᑦ ᐃᓗᓯᓕᕆᓂᖅ ᓄᓇᕕᒻᒥ

ᑕᑯᒋᐊᕈᑎ ᐃᓱᒪᖃᑦᓯᐊᓂᖅ ᖃᓄᐃᓕᖓᒻᒪᖔᑦ ᓄᓇᕕᒻᒥ

ᐃᓱᒫᓗᓐᓇᑐᖅ ᐊᖏᔫᑦᓱᓂ ᐊᓯᑦᔨᓚᖀᓯᒪᔪᖅ ᓄᓇᕕᒻᒥᐅᑦ ᖃᓄᐃᙱᓯᐊᕐᓂᖏᓐᓂᒃ ᒪᓐᓇ ᐱᐅᓯᖃᑎᑦᓴᔭᕆᙱᑕᒥᓄᑦ ᖃᓪᓗᓈᓄᑦ ᑎᑭᑕᐅᓚᐅᕐᓯᒪᓂᐅᑉ ᓱᕐᕂᓯᒪᓂᖓ ᐊᒻᒪᓗ ᐊᒥᓲᓕᖓᑦᓱᑎᒃ ᖁᐊᕐᓵᓇᕐᑐᑰᓚᕿᒍᑎᐅᓯᒪᔪᑦ ᐃᓅᖃᑎᒌᒍᓰᓪᓗ ᐊᓯᑦᔨᑕᐅᓚᕿᓯᒪᓂᖏᑦ ᑕᒪᒃᑯᓄᖓ. ᓄᐃᑕᐅᓚᕿᓯᒪᑦᓱᑎᒃ, ᑕᒪᒃᑯᐊ ᐱᓂᐊᕐᓂᐅᓯᒪᔪᑦ ᓱᕐᕂᓯᒪᖃᑦᑕᓕᕐᑐᑦ ᐃᓅᖃᑎᒌᒍᓯᖏᓐᓂᒃ ᐃᓚᒌᒍᓯᖏᓐᓂᓗ ᐃᓘᓐᓀᑕ, ᐊᒻᒪᓗ ᐱᒋᐊᕐᑎᓯᓯᒪᑦᓱᑎᒃ ᐊᑦᔨᒌᖑᙱᑐᓂᒃ ᐊᒥᓱᓂᒃ ᐃᓱᒪᒨᓕᖓᑦᓱᑎᒃ-ᐃᓅᖃᑎᒌᓐᓂᒧᑦ ᐱᓀᓗᑕᓂᒃ ᑐᑭᓯᒍᓐᓇᓯᕙᓪᓕᐊᓕᑌᓐᓇᑕᕗᓐᓂᒃ ᑲᒪᒋᕙᓪᓕᐊᕋᓱᒍᓐᓇᓯᓕᑌᓐᓇᑕᕗᓐᓂᓗ.

ᐊᒥᓱᑲᓪᓓᑦ ᐃᓅᖃᑎᒌᑦᑐᓂ ᖄᖐᓐᓇᑐᐃᓐᓇᒋᐊᓪᓚᔨᐊᖃᖃᑦᑕᑐᑦ ᐊᑑᑎᒋᐊᓪᓚᖃᑦᑕᓱᑎᒃ ᖁᐊᕐᓵᓇᕐᑐᑰᕐᓇᑐᓂᒃ ᐃᓚᒥᓄᑦ ᕿᒪᑦᑕᐅᖃᑦᑕᓂᕐᓂᓗ ᑎᑭᐅᑎᓚᕿᓐᓇᓯᑐᓪᓗ ᑕᒪᒃᑯᐊ, ᐊᒥᓱᐃᑎᒍᑦ, ᖁᐊᕐᓵᓇᕐᑐᑰᕐᓂᐅᑉ-ᑭᖑᓂᖃᑦᓯᐊᖏᑦᑑᒍᑎᖏᓐᓄᑦ. ᑕᒪᒃᑯᐊ ᖁᐊᕐᓵᓇᕐᑐᑰᕐᓯᒪᓃᑦ ᑲᒪᒋᔭᐅᖃᑦᑕᖏᑐᐊᕐᒪᑕ ᐊᙱᐊᖏᔭᕐᓂᑯᓪᓗ ᒪᒥᑉᐸᓕᐊᓂᖅ ᐱᒋᐊᕐᑎᑕᐅᙱᑐᐊᕐᒪᑦ, ᓱᕐᕂᓂᖏᑦ ᐃᑉᐱᓂᐊᕈᑎᐅᓕᕐᓂᐊᑐᑦ ᐊᒥᓱᐃᓄᑦ ᑭᖑᕚᕇᑦᑐᓄᑦ, ᓄᐃᑦᓯᓚᕿᑦᓱᑎᒃ ᐊᑦᔨᒌᙱᑐᓂᒃ ᐃᓱᒪᒃᑯᑦ ᖃᓄᐃᑦᔪᑎᓄᑦ ᐱᓀᓗᑕᓂᒃ, ᐅᐃᕆᓯᒪᓇᕐᑐᑦ ᐊᑐᓗᑲᑦᑕᐅᓂᖏᓐᓄᑦ ᐃᓱᒫᓗᓐᓇᑐᓂᒃ, ᐱᓂᐊᕐᓂᑎᒍᑦ ᐱᓀᓗᑕᓂᒃ, ᐱᓗᑲᐅᑎᓂᕐᓂᒃ ᐊᒻᒪᓗ ᐊᓪᓛᑦ ᐃᓅᓯᕐᒥᓂᒃ ᑭᐱᓯᑐᐃᓐᓇᓂᕐᓂᒃ.

ᐃᓅᓯᕐᓂᒥᒃ ᑭᐱᓯᑐᐃᓐᓇᓯᒪᔪᑦ ᑭᓯᑕᐅᒪᓂᖏᑦ ᓄᓇᕕᒻᒥ ᐅᓄᕐᓂᐸᐅᕗᑦ ᑯᐯᓕᒫᒥ. ᐃᓘᓐᓇᑎᒃ ᓄᓇᕕᒻᒥᐅᑦ ᓇᒻᒥᓂᕐᒥᓂᐅᒐᓗᐊᕐᒪᑦ ᓇᒻᒥᓂᕆᙱᑕᒥᓂᐅᒐᓗᐊᕐᒪᓘᓐᓃᑦ ᐊᑦᑐᐊᔭᐅᓯᒪᓕᕐᑐᑦ ᐊᑕᐅᓯᐊᕐᓱᑎᒃ ᐊᑕᐅᓯᐊᑐᐃᓐᓇᖏᑦᓱᑎᓪᓘᓃᑦ ᖃᖓᑐᐃᓐᓇᖅ ᐃᓅᓯᕐᒥᓂ. ᐃᓛᒋᐊᓪᓚᒃ ᐊᒥᓱᑲᓪᓓᑦ ᓄᓇᕕᒻᒥᐅᑦ ᐃᓱᒪᓯᒪᕗᑦ ᐃᓅᓯᕐᒥᓂᒃ ᑭᐱᓯᒋᐊᑦᓴ ᐆᒃᑐᓗᑐᕐᓱᑎᓘᓐᓃᑦ. ᐃᓱᒫᓗᓐᓇᒋᐊᓪᓚᑐᖅ ᐃᓅᓱᑦᑐᓂ ᐊᖑᑎᓐᓂᓗ. ᐊᖑᑏᑦ ᓱᕐᕋᑕᐅᓯᒪᕙᓗᓗᐊᕐᒥᔪᑦ ᖃᓪᓗᓈᓄᑦ ᑎᑭᑕᐅᓂᕕᓂᐅᑉ ᐊᐅᓚᒍᓯᖏᑦᑕ ᑭᖑᓂᕆᔭᐅᒍᑎᓄᑦ. ᐱᖁᔭᖃᕐᓂᑎᒍᑦ ᐋᕐᕿᓱᕐᓯᒪᔪᓂ ᐊᒥᓱᕕᓗᐊᕐᓱᑎᒃ ᓄᐃᒋᐊᑭᑦᑑᓗᐊᕐᐸᑐᑦ ᐊᒻᒪᓗ ᐃᓕᓐᓂᐊᑕᒥᓂᒃ ᐊᓂᒍᐃᒻᒣᑐᐃᑦ ᐃᓅᓯᕐᒥᓂᒃ ᑭᐱᓯᔪᕕᓃᓪᓗ ᑭᓯᑕᐅᓯᒪᒍᑎᖏᓐᓂᑦ.

ᑕᑯᒋᐊᕈᑎ ᐃᓱᒪᖃᑦᓯᐊᓂᕐᒧᑦ ᐱᒍᑦᔨᐅᑎᓂᒃ ᓄᓇᓕᓕᒫᓂ

ᓄᓇᕕᒻᒥ, ᓄᓇᓕᓐᓂ ᐋᓐᓂᐊᕕᖏᓐᓂ ᐱᒍᑦᔭᐅᕕᖏᑦ ᐃᓘᓐᓇᒐᓚᖏᑦ ᐊᑐᕐᓱᒋᑦ ᑲᒪᒋᔭᐅᒋᐊᙵᕕᐅᓲᑦ ᐃᓱᒪᖃᑦᓯᐊᓂᕐᒧᑦ ᐱᒍᑦᔨᐅᑎᓂᒃ. ᐱᒋᐊᙵᐅᑎᑐᐃᓐᓇᐅᓱᑎᒃ ᐱᒍᑦᔨᐅᑏᑦ ᐊᑐᐃᓐᓇᐅᑎᑕᐅᓲᑦ ᓄᓇᓕᒻᒥ ᐋᓐᓂᐊᓯᐅᕐᑎᖓᓄᑦ ᐃᓄᓕᕆᔨᖏᓐᓄᓗ. ᐃᑲᔪᕐᑕᐅᔪᐃᑦ ᑕᑯᔭᐅᔪᑦᓴᓕᐊᕆᔭᐅᒍᓐᓇᕕᖃᓲᑦ ᐋᓐᓂᐊᓯᐅᕐᑎᒪᕆᒻᒧᑦ ᓄᓇᓕᒻᒥᓂ ᐱᓇᓱᐊᕐᑐᒧᑦ ᓄᓇᓕᒻᒥᑕ ᐊᓯᐊᓃᑦᑐᒧᓪᓘᓃᑦ. ᓄᓇᓕᒻᒥ ᐋᓐᓂᐊᓯᐅᕐᑎᖏᑦ ᐃᓄᓕᕆᔨᖏᓪᓗ ᐱᑕᖃᕐᑎᓯᖏᓐᓇᓯᐊᕋᓱᑦᑐᑦ ᑫᕙᓪᓚᒍᓰᑦ ᐊᕙᑎ-ᓯᑕᒪᓪᓗ ᑫᕙᓪᓚᓂᖏᓐᓂᑦ ᑕᒫᑦ ᐃᓱᒪᓕᕆᔭᐅᓂᕐᒧᐊᖓᔪᓂᒃ ᐅᐃᒪᓇᕐᑎᓗᒍ ᐱᒍᑦᔨᐅᑎᓂᒃ.

ᐅᖓᕙᒥ ᓄᓇᓕᖏᓐᓂ, ᐊᑕᐅᓯᐅᕗᖅ ᐱᐊᕋᕐᓄᑦ ᐃᓱᒪᓕᕆᔨ ᐊᒻᒪᓗ ᐊᑕᐅᓯᐅᒻᒥᔪᖅ ᐃᓄᒻᒪᕆᓐᓄᑦ ᐃᓱᒪᓕᕆᔨ ᑕᒪᕐᒥᒃ ᐱᓇᓱᐊᕐᕕᓖᒃ ᑰᒃᔪᐊᒥ. ᐃᑲᔪᕐᓯᒪᒍᑎᓂᒃ ᐱᑕᖃᕐᑎᓯᒍᓐᓇᒥᔫᒃ ᑖᒃᑯᐊ ᐊᓯᖏᓐᓂ ᓄᓇᓕᓐᓂ ᐅᖓᕙᐅᑉ ᓯᑦᔭᖓᓃᑦᑐᓂ, ᐅᕝᕙᓘᓐᓃᑦ ᓄᓇᓕᓐᓂ ᐊᓯᖏᓐᓂᑦ ᐱᔪᓂᒃ ᐃᑲᔪᕈᓐᓇᕕᖃᕐᒥᓱᑎᒃ.

ᐃᓂᑦᓴᖃᕐᐸᑦ, ᓄᓇᕕᒻᒥᐅᑦ ᐊᑯᓃᕐᑐᒥᒃ ᐃᓱᒪᒥᒍᑦ ᐃᑲᔪᕐᓯᔭᐅᒋᐊᓖᑦ ᓄᓇᕕᒻᒥ ᓯᑕᒪᓂᒃ ᐱᒍᑦᔭᐅᕕᑦᓴᖃᓕᕐᖁᑦ:

  • ᐋᓐᓂᐊᕕᑐᖃᖅ, ᐳᕕᕐᓂᑐᒥ ᐅᐃᒪᓇᕐᓯᔪᓄᑦ
  • ᐊᓇᕐᕌᓗᒃ ᐃᓄᑦᔪᐊᒥ
  • ᑰᑦᔪᐊᒥᓪᓗ ᐊᓇᕐᕋᕆᔭᐅᒍᓐᓇᑐᖅ ᐃᑉᐱᒍᓱᑦᑎᑕᖃᕐᓱᓂ
  • ᐅᕙᑦᑎᓄᑦ, ᐳᕕᕐᓂᑐᒥ ᐊᓇᕐᕋᕆᔭᐅᒍᓐᓇᑐᖅ ᐃᑉᐱᒍᓱᑦᑎᑕᖃᕐᓱᓂ

ᐃᑲᔪᕐᓯᓂᖏᑎᒍᑦ ᓄᓇᕕᒻᒥᒃ ᒥᑭᐅᓪ ᐃᓕᓐᓂᐊᕕᕐᔪᐊᑉ ᐋᓐᓂᐊᓯᐅᕆᓂᕐᓄᑦ ᐱᑐᑦᓯᒪᖃᑎᒌᑦᑐᖏᑦᑕ (ᐱᓇᓱᖃᑎᒌᑦᑐᑦ ᐃᓕᓐᓂᐊᕕᕐᔪᐊᑎᒍᑦ ᖃᓄᐃᙱᓯᐊᕐᓂᓕᕆᓂᕐᒥᒃ-ᒥᑭᐅᓪ), ᐱᓪᓗᑯᒋᐊᓕᓐᓂᒃ ᐃᓱᒪᓕᕆᔭᐅᓂᕐᓂᓗ ᑲᒪᒋᔭᖃᕈᑏᑦ ᐊᑐᐃᓐᓇᐅᑎᑕᐅᕗᑦ ᓄᓇᓕᓕᒫᓄᑦ. ᐃᓱᒪᓕᕆᔩᑦ ᐱᐊᕋᕐᓄᓗ ᐃᓱᒪᓕᕆᔩᑦ ᖃᓪᓗᓈᓂᑦ ᐱᓯᒪᑦᓱᑎᒃ ᑎᑭᓯᒪᓚᐅᕐᑐᕙᑦᑐᑦ ᓄᓇᓕᓕᒫᓄᑦ ᓇᓪᓕᐅᑎᑦᑕᑐᓂᒃ ᑎᑭᓯᒪᕕᖃᕐᐸᓱᑎᒃ. ᑖᒃᑯᐊ ᐃᓱᒪᓕᕆᔩᑦ ᐃᑲᔪᕐᓯᒍᓐᓇᓲᖑᒻᒥᔪᑦ ᓄᓇᓕᒻᒥ ᐱᓇᓱᑦᑎᓄᑦ ᑭᙴᒪᒋᔭᐅᓕᑐᐊᕋᒥᒃ. ᐃᓚᖏᑦ ᓄᓇᕕᒻᒥᐅᑦ ᑭᙴᒪᑦᓯᑐᐊᕐᒪᑕ ᑲᒪᒋᔭᐅᑦᓯᐊᓗᑯᐊᐱᒋᐊᓕᓐᓂᒃ ᐃᓱᒪᖃᑦᓯᐊᓂᕐᒧᑦ ᐱᒍᑦᔨᐅᑎᓂᒃ ᑲᒪᒋᔭᐅᒍᑎᖃᖃᑦᑕᑐᑦ ᐱᓪᓗᑯᒋᐊᓕᓐᓂᒃ ᐱᒍᑦᔨᐅᑎᓂᒃ ᑕᒃᓚᔅ ᐃᓱᒪᖃᑦᓯᐊᓂᕐᒧᑦ ᐃᓕᓐᓂᐊᕕᕐᔪᐊᖓᑕ ᐋᓐᓂᐊᕕᖓᓂ ᒪᓐᑐᕆᐊᓪᒦᑦᑐᒥ. ᓄᓇᕕᐅᑉ ᐋᓐᓂᐊᕕᖏᑦ ᐊᑎᓕᐅᕇᕐᓯᒪᓕᕐᑐᑦ ᐊᖏᖃᑎᒌᒍᑎᒥᒃ ᑕᒃᓚᔅ ᐋᓐᓂᐊᕕᖓᓂᒃ ᐊᑎᓕᐅᖃᑎᖃᕐᓱᑎᒃ ᐃᓱᐊᕐᓯᓕᐅᒥᑎᑦᓯᓂᕐᒧᑦ ᐱᒍᑦᔨᐅᑎᓂᒃ ᐃᑲᔪᕐᑕᐅᔪᓄᑦ ᐃᑲᔪᕐᓯᓂᕐᒧᓗ ᖃᐅᔨᕙᓪᓚᒋᐊᕈᑎᓂᒃ ᐱᓇᓱᑦᑎᓂᒃ.

I always run out of time at the end and so I dont have time to check over best paper writing site my work and present it neatly