ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐅᖄᒋᐊᕐᑐᓯᒪᔨᐊᖃᕐᓂᖁᑦ ᓯᑕᒪᐅᔪᖕᖏᒐᕐᑑᒍᑎᖓᓄᑦ ᑯᐯᒻᒥ ᑲᑎᒪᓂᕐᔪᐊᒧᑦ ᑲᒃᑲᓛᑦ ᐱᐊᕃᑦ ᐃᓅᓱᑦᑐᐃᓗ ᑲᒪᒋᔭᐅᑦᓯᐊᖏᓐᓂᖓᓅᓕᖓᔪᒥᒃ

ᓚᐅᔭ ᒪᑮᒪᓐ ᐊᒻᒪᓗ ᑯᓘᐃ ᓈᖄᔅ
ᓚᐅᔭ ᒪᑮᒪᓐ ᐊᒻᒪᓗ ᑯᓘᐃ ᓈᖄᔅ

ᐅᓪᓗᒥ ᑲᖐᓱᑦᑎᓯᒋᐊᕐᓂᐅᕗᖅ ᓄᓇᕕᒻᒥ ᐅᕕᒐᕐᑐᐃᑦ ᖃᓄᐃᖕᖏᓯᐊᕆᐊᖃᕐᓂᖏᓐᓄᑦ ᐱᒍᑦᔨᐅᑏᑦ ᓄᓇᕕᒻᒥᐅᓅᓕᖓᑎᑕᐅᒋᐊᖃᕐᓂᖏᓐᓄᑦ

ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᓇᓱᑦᑎᖏᑦ ᑯᓘᐃ ᓈᖄᔅ, ᐅᕕᒐᕐᑐᓂᒃ ᐃᓚᒌᓂᓪᓗ ᐱᒍᑦᔨᐅᑎᓕᕆᔨ ᐊᒻᒪᓗ ᓚᐅᔭ ᒪᑮᒪᓐ, ᐃᓚᒌᑎᒍᑦ ᐱᓗᑲᐅᑎᓂᕐᓄᑦ ᐃᑦᓯᒎᓐᓂᓗᕐᓂᓄᓪᓗ ᐱᒍᑦᔨᐅᑎᓕᕆᔨ, ᐅᖄᔪᕕᓃᒃ ᕿᑎᕋᕇᕐᑎᓗᒍ ᓯᑕᒪᐅᔪᖕᖏᒐᕐᑑᒍᑎᖓᓄᑦ ᑯᐯᒻᒥ ᑲᑎᒪᓂᕐᔪᐊᒧᑦ ᑲᒃᑲᓛᑦ ᐱᐊᕃᑦ ᐃᓅᓱᑦᑐᐃᓗ ᑲᒪᒋᔭᐅᑦᓯᐊᖏᓐᓂᖓᓅᓕᖓᔪᒥᒃ, ᒪᓐᑐᕆᐊᒥ ᐅᒃᑑᐱᕆᒥ 26-ᒥ 27-ᒧᑦ.

ᐅᖃᐅᓯᖃᕐᑐᕕᓃᒃ ᓱᕐᕃᓯᒪᓂᖓᓂᒃ ᐱᒍᑦᔨᐅᑏᑦ ᓄᓇᕕᒻᒥᐅᓅᓕᖓᑎᑕᐅᖕᖏᓂᖏᓐᓄᑦ ᓱᕐᕃᓯᒪᒍᓐᓇᓂᖏᑦᑕ ᑲᒃᑲᓛᓂᒃ ᐱᐊᕋᕐᓂᒃ ᐊᒻᒪᓗ ᐱᒻᒪᕆᐅᒋᐊᖓᓂᒃ ᐃᓱᒪᑦᓴᓯᐅᕈᑕᐅᒋᐊᓪᓚᕆᐊᖃᕐᓂᖏᑦᑕ ᐱᒍᑦᔨᐅᑏᑦ ᐃᓂᓪᓚᖓᐅᓯᖏᑦᑕ. ᑯᓘᐃᓗ ᓚᐅᔭᓗ ᐱᒋᐊᕐᓂᓕᐅᑎᓕᕕᓃᒃ ᑲᑎᒪᔪᓃᑦᑐᓂᒃ ᓄᓇᕕᒻᒥᒃ ᐅᖃᐅᓯᖃᖄᓱᑎᒃ ᐱᐅᓯᐅᖃᑦᑕᓯᒪᔪᓂᒃ ᑕᒐᑕᒐᓗ ᐱᐅᓯᐅᓕᕐᑐᓂᒃ ᓄᓇᕕᒻᒥ ᓱᕐᕃᓂᖃᕐᓯᒪᔪᓂᒃ ᓄᓇᕕᒻᒥᐅᑦ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐱᓗᐊᕐᑐᖅ ᑲᒃᑲᓛᑦ ᐱᐊᕃᑦ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ.

ᐅᖄᔩᑦ ᐅᖃᐅᓯᖃᕐᓂᐸᐅᔪᕕᓃᑦ ᐊᒥᓱᓂᒃ ᐱᒐᓱᐊᒻᒪᕆᓐᓇᑑᓲᓂᒃ ᓄᓇᕕᒻᒥᐅᓅᓕᖓᑎᑦᓯᒐᓱᐊᕐᑐᖃᓕᕋᒥ ᐱᒍᑦᔨᐅᑎᓂᒃ, ᐅᑦᑐᕋᐅᑎᒋᑦᓱᒍ ᐱᓇᓱᑦᑎᓭᓪᓘᓂᖅ, ᐱᓇᓱᑦᑏᑦ ᓄᕐᙯᓇᕐᓂᕆᓲᖏᑦ, ᐱᖁᔦᑦ ᐊᒻᒪᓗ ᑭᖕᖒᒪᒋᔭᐅᔪᑦ. ᐱᒻᒪᕆᐅᑎᑦᓯᓚᐅᕐᑐᑦ ᐱᒍᑦᔨᐅᑏᑦ ᓄᓇᕕᒻᒥᐅᓅᓕᖓᑎᑕᐅᑦᓯᐊᓚᖓᑉᐸᑕ, ᐃᓄᐃᑦ ᐱᒻᒪᕆᖁᑎᖏᑦ ᓯᕗᓪᓕᐅᔭᐅᒋᐊᖃᕆᐊᖏᑦᑕ ᐱᓇᓱᐊᕐᑕᐅᓂᖓᓄᑦ. ᐊᖕᖏᐊᖏᔭᕐᓂᖅ ᑕᒪᑐᒧᖓ ᐃᓚᐅᑎᑕᐅᑦᓯᐊᕆᐊᓕᒃ. ᐃᓄᐃᑦ ᐱᓇᓱᑦᑏᑦ ᐊᒥᓱᒋᐊᓪᓚᐅᒋᐊᓖᑦ ᑲᒪᒋᐊᖕᖓᑎᐅᓂᕐᒥᒃ ᐱᓇᓱᐊᕐᑐᑦ ᐊᒻᒪᓗ ᓄᓇᓖᑦ ᖃᐅᔨᒋᐊᕐᕕᐅᒋᐊᓪᓚᓗᑎᒃ ᓇᓗᓀᕐᑕᐅᓂᕐᖁᑦ ᑖᒃᑯᐊ ᒪᕐᕉᓱᑎᒃ ᐅᑦᑐᕋᐅᑎᑦᓯᐊᒍᓐᓂᒪᓃᒃ ᐋᕐᕿᒋᐊᕈᑎᑦᓴᓯᐅᕐᓂᓄᑦ. ᖃᐅᔨᓴᕐᓂᖅ ᖃᐅᔨᔭᐅᓯᒪᔪᐃᓪᓗ ᐱᓇᓱᑦᓯᐊᕈᑎᑦᓭᑦ ᐱᒍᑦᔨᐅᑏᑦ ᓄᓇᕕᒻᒥᐅᓅᓕᖓᑎᑕᐅᒋᐊᓯᒍᑎᒃ ᐃᓄᓐᓅᓕᖓᒋᐊᖃᕐᓂᖏᑦᑕ ᐅᖃᐅᓯᐅᓐᓂᒥᔪᑦ.

ᓯᕗᓪᓕᐹᑦᓯᐊᒥ ᓄᓇᕕᒻᒥᒃ ᑭᒡᒐᑐᕐᑐᑦ ᐅᖄᒋᐊᕐᑐᓯᒪᓐᓂᖁᑦ ᑲᑎᒪᓂᕐᔪᐊᒧᑦ ᑌᒣᑦᑐᒧᑦ. ᐅᖄᒋᐊᕐᑐᓯᒪᔨᐊᖃᕐᓂᖅ ᐱᐅᔪᒻᒪᕆᐅᕗᖅ ᓄᓇᕕᒻᒥᒃ ᑭᒡᒐᑐᕐᑐᓂᒃ. ᒥᓂ ᑯᔦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑲᒪᔨᒻᒪᕆᖓ ᐅᖃᕐᑐᕕᓂᖅ: “ᐱᓇᓱᒍᓯᒋᔭᐅᔪᑦ ᐱᖁᔦᓪᓗ ᐃᓄᓐᓂᑦ ᐱᓯᒪᖕᖏᑐᑦ ᐱᒍᑦᔨᐅᑎᐅᒡᒐᑕᕋᓱᐊᓲᒍᕗᑦ ᐃᓕᕐᖁᓯᖓ ᐃᓄᐃᑦ ᐃᓱᒪᒋᔭᐅᒐᓛᑦᑎᓇᒍ ᑌᒪ ᐃᓅᓯᕗᑦ ᓱᕐᕋᑕᐅᓪᓚᕆᓐᓂᐊᓕᕐᒪᑦ ᐃᓱᐊᖕᖏᑐᒃᑯᑦ. ᐱᒍᑦᔨᔨᐅᑦᓱᑕ, ᑲᒪᔨᕗᑦ ᐊᕐᓱᕈᕐᓇᑐᒃᑰᑎᑕᐅᖃᑦᓴᓲᒍᕗᑦ ᑕᒪᒃᑯᓂᖓ ᐱᖁᔭᓂᒃ ᒪᓕᑦᑕᐅᑎᑦᓯᒐᓱᐊᕐᓱᑎᒃ ᐹᕐᓯᖓᐅᑎᓕᓐᓂᒃ ᐃᓄᐃᑦ ᐱᒻᒪᕆᖁᑎᖏᓐᓂᒃ ᐃᓚᒌᒍᓯᖏᓐᓂᓗ. ᑕᒪᒃᑯᐊ ᐅᖃᐅᓯᐅᖃᑦᑕᕆᐊᓕᒻᒪᕇᑦ.”

ᑯᓘᐃᓗ ᓚᐅᔭᓗ ᑕᒪᑐᒥᖓ ᐅᓂᒃᑳᓕᐅᕈᑎᖃᓛᕐᑐᑦ ᖃᒻᒥᑯᑦ.

ᑐᑭᓯᒋᐊᓪᓚᕕᑦᓴᖅ ᑕᒪᓐᓇ ᐱᒻᒪᕆᒃ ᑲᑎᒪᓂᕐᔪᐊᖃᕈᑎᕕᓂᐅᑎᓪᓗᒍ ᑐᑭᓯᒋᐊᓪᓚᕈᒪᒍᕕᑦ http://saac.chu-sainte-justine.org/maltraitance2015.html

 

Facebooktwittergoogle_plusmailFacebooktwittergoogle_plusmail

ᐅᖃᐅᓯᑦᓴᑎᑦ ᑭᐅᒍᑎᑦᓴᑎᓪᓘᓃᑦ ᒫᓂ ᐊᒡᓚᓗᒋᑦ

ᖃᕆᑕᐅᔭᒃᑯᑦ ᑐᕌᒍᑎᑎᑦ ᓄᐃᑕᑎᑕᐅᓚᖓᙱᑐᑦ. ᐊᒡᓚᕕᐅᓯᒪᓪᓗᑐᕆᐊᖃᕐᓂᖏᑦ ᓇᓗᓀᕐᑕᐅᓯᒪᒍᑎᓖᑦ ᐃᒣᓕᖓᔪᒧᑦ •