ᐅᕕᒃᑫᑦ ᐱᒍᑦᔭᐅᒋᐊᓖᑦ ᓄᓇᕕᒻᒥ

ᑕᑯᒋᐊᕈᑎ ᐃᓅᓱᑦᑐᐃᑦ ᖃᓄᐃᓕᖓᔪᒦᓐᓂᖏᓐᓂᒃ ᓄᓇᕕᒻᒥ

ᓄᓇᕕᒻᒥᐅᑦ ᐊᕐᓇᐃᑦ ᕿᑐᕐᖓᑖᕆᐅᒍᑎᒥᓂᒃ ᐅᑭᐅᑭᑦᑑᖏᓐᓇᓱᑎᒃ ᕿᑐᕐᖓᑖᓲᑦ ᐊᒻᒪᓗ ᐊᒥᓲᓂᕐᓴᒪᕆᓐᓂᒃ ᕿᑐᕐᖓᑖᓲᑦ ᐊᓯᖏᓐᓂᑦ ᑯᐸᐃᓕᒫᒥ ᐊᕐᓇᓂᑦ. ᓄᓇᕕᐅᑉ ᐃᓄᖏᑦ ᐃᑉᐱᓇᕐᑑᒍᑎᓖᑦ ᐅᓄᕐᑐᒪᕆᐅᓂᖏᓐᓄᑦ ᐃᓅᓱᑦᑐᐃᑦ ᐃᓄᐃᑦ: 40%-ᖏᑦ ᐃᓄᖏᑦᑕ 15-ᓂᒃ ᐅᑭᐅᑭᓐᓂᓴᐃᑦ ᐊᒻᒪᓗ 57%-ᖏ ᐃᓄᓕᒫᖏᑦᑕ 25-ᓂᒃ ᐅᑭᐅᑭᓐᓂᓴᐅᑦᓱᑎᒃ. ᐃᓕᓐᓂᐊᕕᒻᒥ ᐱᔭᕇᓲᖑᙱᑐᐃᑦ ᐳᕐᑐᔪᒦᑦᑐᐹᓘᖏᓐᓇᕋᓗᐊᕐᑎᓗᒋᑦ, ᐃᓕᓐᓂᐊᕕᒻᒥ ᐱᔭᕇᖃᑦᑕᑐᐃᑦ ᐊᒥᓱᙳᕙᓪᓕᐊᒑᑕᕐᑑᒐᓗᐊᑦ ᐊᕐᕌᒍᑕᒫᑦ. ᓄᓇᕕᒻᒥᐅᑦ ᐃᓅᓱᑦᑐᐃᑦ ᐱᑐᑦᓯᒪᓕᕐᐸᓕᐊᕗᑦ ᐃᓄᑐᐃᓐᓇᐅᖃᑎᒥᓄᑦ ᐅᑭᐅᕐᑕᑐᓕᒫᒥ ᓄᓇᕐᔪᐊᒥᓪᓗ ᐊᑦᔨᒌᙱᓕᕇᑦᑐᓂᒃ ᐱᓇᓱᐊᕐᑕᐅᔪᓂᒃ ᐃᓚᐅᕕᖃᕐᐸᓱᑎᒃ ᐊᒻᒪᓗ ᖃᕆᑕᐅᔭᒃᑯᑦ ᐱᑐᑦᓯᒪᖃᑎᒌᕝᕕᑯᑦ.

xᔅᑑᓯᒥᐅᑕᓄᑦ ᐃᓚᐅᓕᕐᑎᑕᐅᓯᒪᓂᕐᒧᑦ ᐊᒻᒪᓗ ᐊᓂᕐᕋᒥᓂᑦ ᓅᑦᑎᑕᐅᑦᓱᑎᒃ ᐃᓕᓐᓂᐊᕆᐊᕐᑎᑕᐅᓯᒪᓂᕐᒧᑦ, ᖃᓪᓗᓈᑐᐃᓐᓇᐃᑦ ᐱᖁᔭᖃᕈᓯᖏᑦᑕ ᐃᓕᓐᓂᐊᕕᖃᕈᓯᖏᑦᑕᓗ ᐋᕐᕿᓱᕐᓯᒪᒍᓯᖏᑦ ᐊᒻᒪᓗ ᐃᓄᓕᕆᔨᖃᕐᓂᑯᑦ ᐃᓅᓱᑦᑐᐃᑦ ᓴᐳᒻᒥᔨᖃᕐᓂᖏᑎᒍᓪᓗ ᐱᒍᑦᔨᐅᑎᖃᕐᓃᑦ ᐃᒪᐃᓕᖓᓚᕿᒍᑎᐅᓕᕐᓱᑎᒃ ᓱᕐᕋᑕᐅᑦᓱᑎᒃ ᐊᒥᓱᐃᑦ ᐃᓄᐃᑦ ᓇᒻᒥᓂᖅ ᐃᓕᓴᐃᒍᓯᖃᕈᓐᓇᓂᖏᑦ ᐃᓅᓯᕐᒥᓂᒃ ᑐᙵᕕᓪᓚᕆᒻᒥᒃ ᐃᓕᓐᓂᐊᑎᑕᐅᑦᓯᐊᓂᑦᓴᖏᓐᓄᑦ, ᓴᐳᒻᒥᔭᐅᑦᓯᐊᓂᑦᓴᖏᓐᓄᑦ ᐃᑲᔪᕐᑕᐅᓯᐊᕈᑎᑦᓴᖏᓐᓄᓗ ᕿᑐᕐᖓᒥᑕ. ᐃᓱᒪᒨᓕᖓᔪᓄᑦ-ᐃᓅᖃᑎᓂᒃ ᐱᓇᐃᓗᑕᖃᓚᕿᓃᑦ, ᐃᓚᒋᔭᐅᒻᒥᑎᓪᓗᒍ ᖁᐊᕐᓵᓇᕐᑐᑰᕐᓯᒪᓂᕐᒧᑦ ᐃᓱᒪᔮᕐᓂᒦᓚᕿᓂᖅ, ᑲᕙᕐᑎᖓᓂᕐᒧᑦ ᑭᑦᓴᓂᖅ, ᐅᐃᕆᓯᒪᓂᖅ ᐊᒻᒪᓗ ᑎᒍᔭᐅᒪᕕᒻᒨᓂᖅ ᐊᓪᓛᑦ, ᐱᒍᓐᓇᖏᐅᒪᓚᕿᒍᑎᐅᕗᑦ ᐃᓚᖏᓐᓄᑦ ᕿᑐᕐᖓᓕᓐᓄᑦ ᓈᒻᒪᓈᕐᓯᒪᔪᒃᑯᑦ ᐊᑑᑎᑦᓯᐊᕈᓐᓇᓂᕐᒥᒃ ᐃᒫᒃ ᐊᖓᔪᖅᑳᕆᔭᐅᓂᕐᒥᒍᑦ ᕿᑐᕐᖓᒥᓄᑦ ᐅᓪᓗᒥᐅᓕᕐᑐᖅ. ᐊᑑᑎᖃᑦᑕᓂᖏᑦ ᐱᒋᐊᖃᑦᑕᐅᑎᓃᑦ ᐊᒻᒪᓗ ᓄᓕᐊᕐᓂᑯᑦ ᐱᓗᑲᖃᑦᑕᓃᑦ ᐃᓚᒋᔭᐅᒻᒥᑎᓪᓗᒋᑦ ᑲᒪᒡᒋᓗᓐᓃᑦ ᐃᓱᒫᓗᓐᓇᑐᒦᒍᑎᐅᕗᑦ ᓄᓇᕕᒻᒥ. ᑕᒪᒃᑯᐊ ᖃᓄᐃᓕᖓᔪᒦᓐᓃᑦ ᓱᕐᕋᐃᔪᑦ ᐊᒥᓱᓂᒃ ᐱᐊᕋᕐᓂᒃ ᕿᑐᕐᖓᓕᓐᓂᓗ.

ᐊᕐᕌᒍᓂ 30-ᒐᓚᐅᓕᕐᑐᓂᒃ ᖄᖏᕐᑐᓂᑦ, ᐃᓱᒫᓗᓐᓇᓯᓯᒪᔪᓂᒃ ᐳᕐᑐᓯᕙᓪᓕᐊᑐᐃᓐᓇᑐᖃᕐᓯᒪᕗᖅ ᐃᓅᓯᕐᒥᓂᒃ ᑭᐱᓯᑐᐃᓐᓇᖑᓱᖃᑦᑕᑐᓂᒃ ᓄᓇᕕᒻᒥ. ᑕᒪᓐᓇ ᐃᓱᒫᓗᓐᓇᕆᐊᓪᓚᕈᑎᓕᒃ ᐃᒫᒃ ᐃᓅᓯᕐᒥᓂᒃ ᑭᐱᓯᑐᐃᓐᓇᓂᖅ ᑐᖁᓚᕿᒍᑎᐅᖃᑦᑕᑐᓂ ᐳᕐᑐᓂᕐᐹᒐᓚᐅᒻᒪᑦ ᐃᓄᒻᒪᕆᙳᖃᒻᒥᐅᓂᕐᓴᓄᑦ (20-ᓂᑦ 34-ᓄᑦ ᐅᑭᐅᓕᓐᓂ). ᐃᓅᓯᕐᒥᓂᒃ ᑭᐱᓯᑐᐃᓐᓇᓂᖅ ᐃᑯᓪᓚᒐᓛᙱᑐᒥᒃ ᐃᓱᒪᔮᕈᑎᐅᕙᑉᐳᖅ ᐅᑭᐅᓕᓐᓄᑦ 15-ᓂᑦ 24-ᓄᑦ ᐃᓅᓱᑦᑐᓄᑦ. ᓱᕈᓰᑦ ᐊᒻᒪᓗ ᐊᖑᑎᙳᕙᓪᓕᐊᔪᑦ ᐊᑦᑐᐊᔭᐅᓗᐊᕐᓂᐸᐅᕗᑦ. ᑭᑦᓴᓂᕐᒦᖃᑦᑕᓂᖏᑦ ᐃᓅᓯᕐᒥᓂᒃ ᑭᐱᓯᑐᐃᓐᓇᕈᒪᓚᕿᒍᑎᖏᑦ ᐃᓕᖓᕙᓗᑦᑐᑦ ᓱᕐᖁᐃᑐᒥᒃ ᖃᐅᔨᔭᐅᓯᒪᖃᑦᑕᖏᓐᓂᖏᓐᓄᑦ ᐃᓱᒪᒥᒍᑦ ᖃᓄᐃᒍᑎᖃᕐᓱᑎᒃ, ᐃᒥᐊᓗᒻᒥᒃ ᐋᖓᔮᓐᓇᑐᓂᓪᓘᓃᑦ ᐊᑐᓗᐊᕐᓂᒧᑦ ᐊᒻᒪᓗᑦᑕᐅᖅ ᐊᑑᑎᓯᒪᓂᕐᒧᑦ ᓄᓕᐊᕐᓂᑯᑦ ᐱᓗᑲᑦᑕᐅᓯᒪᓂᕐᒥᒃ ᐅᕝᕙᓘᓐᓃᑦ ᐱᒋᐊᖃᑦᑕᑕᐅᖃᑦᑕᓂᕐᒥᒃ. ᐃᒥᐊᓗᓗᐊᖃᑦᑕᓂᖅ ᐅᕝᕙᓘᓐᓃᑦ ᐋᖓᔮᓕᓗᐊᖃᑦᑕᓂᖅ ᐊᒻᒪᓗ ᐅᑭᐅᑭᑦᑑᖏᓐᓇᓱᑎᒃ ᓱᐴᕐᑐᒐᕐᒥᒃ ᐋᖓᔮᓐᓇᑐᕐᑐᓯᖃᑦᑕᓂᖏᑦ ᓄᓇᕕᒻᒥᐅᑦ ᐃᓅᓱᑦᑐᐃᑦ ᐃᓱᒫᓗᓐᓇᕈᑎᐅᒋᕗᑦ ᐊᒻᒪᓗ ᐊᑦᑕᓇᕐᑐᒦᒍᑎᓄᑦ ᐃᓚᒋᔭᐅᓕᖃᑦᑕᓱᑎᒃ ᐃᓅᓯᕐᒥᓂᒃ ᑭᐱᓯᑐᐃᓐᓇᕋᓱᐊᕈᑎᓄᑦ.ᐊᓪᓛᑦ, ᐱᒍᓐᓇᖏᐅᒪᓚᕿᒍᑎᐅᕗᑦ ᐃᓚᖏᓐᓄᑦ ᕿᑐᕐᖓᓕᓐᓄᑦ ᓈᒻᒪᓈᕐᓯᒪᔪᒃᑯᑦ ᐊᑑᑎᑦᓯᐊᕈᓐᓇᓂᕐᒥᒃ ᐃᒫᒃ ᐊᖓᔪᖅᑳᕆᔭᐅᓂᕐᒥᒍᑦ ᕿᑐᕐᖓᒥᓄᑦ ᐅᓪᓗᒥᐅᓕᕐᑐᖅ. ᐊᑑᑎᖃᑦᑕᓂᖏᑦ ᐱᒋᐊᖃᑦᑕᐅᑎᓃᑦ ᐊᒻᒪᓗ ᓄᓕᐊᕐᓂᑯᑦ ᐱᓗᑲᖃᑦᑕᓃᑦ ᐃᓚᒋᔭᐅᒻᒥᑎᓪᓗᒋᑦ ᑲᒪᒡᒋᓗᓐᓃᑦ ᐃᓱᒫᓗᓐᓇᑐᒦᒍᑎᐅᕗᑦ ᓄᓇᕕᒻᒥ. ᑕᒪᒃᑯᐊ ᖃᓄᐃᓕᖓᔪᒦᓐᓃᑦ ᓱᕐᕋᐃᔪᑦ ᐊᒥᓱᓂᒃ ᐱᐊᕋᕐᓂᒃ ᕿᑐᕐᖓᓕᓐᓂᓗ.

ᒪᐃᓕᖓᒐᓗᐊᕐᒥᓱᓂ, ᓄᓇᕕᒻᒥᐅᑦ ᐃᑉᐱᒋᔭᖃᕈᓐᓇᕋᓗᐊᕐᓱᑎᒃ ᐊᒥᓱᐃᑦ ᐱᐊᕋᐃᑦ ᐊᑦᑕᓇᕐᑐᒦᖃᑦᑕᕆᐊᖏᑦ ᑲᒪᒡᒋᓗᑦᑕᐅᓂᕐᒧᑦ ᐱᓗᑲᑦᑕᐅᓂᕐᒧᓘᓐᓃᑦ, ᐊᒻᒪᓗ ᖃᓄᐃᓘᕐᑐᖃᕆᐊᖃᕆᐊᖓ ᑖᒃᑯᐊ ᓴᐳᑎᒋᐊᕋᓱᓪᓗᒋᑦ. ᐊᒥᓱᑦ ᐅᖃᕐᓯᒪᕗᑦ ᖁᕕᐊᓱᙱᓚᕆᒍᑎᒥᓂᒃ ᐃᒫᒃ ᕿᑐᕐᖓᓖᑦ, ᐃᓚᖏᓪᓗ ᐊᒻᒪᓗ ᓄᓇᓕᒻᒦᑐᐃᑦ ᐅᓪᓗᒥᐅᓕᕐᑐᖅ ᐱᑕᖃᕐᑎᓯᑦᓯᐊᕈᓐᓇᖏᒋᐊᖏᑦ ᑭᙴᒪᒋᔭᐅᓪᓗᑐᕐᑐᓂᒃ ᓴᐳᒻᒥᔭᐅᒍᑎᒋᒋᐊᓕᖏᓐᓂᒃ ᓄᓇᕕᒻᒥᐅᑦ ᐱᐊᕋᖏᑦᑕ ᐃᓚᖏᑦᑕ, ᑕᒪᓐᓇ ᑭᙴᒪᑦᓯᒍᑎ ᐊᐅᓚᑦᔭᐃᓕᕐᕿᑖᕐᓯᒪᓕᕐᑐᖅ ᐳᕐᑐᔪᒻᒪᕆᐊᓗᒻᒦᓕᕐᑐᓂᒃ ᐊᑐᕐᑕᐅᒋᐊᖃᕐᓯᒪᓂᖏᓐᓂᒃ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᑦᑕ ᐱᒍᑦᔨᐅᑎᖏᑦ.

ᐊᐃᑉᐹᒍᑦ, ᐊᕐᕌᒍᐃᑦ ᐊᒥᓲᓪᓗᐊᖏᑦᑐᑦ ᖄᖏᕐᑐᑦ ᐃᑉᐱᓇᕐᓯᑎᑦᓯᕗᑦ ᓄᓇᕕᒻᒥᐅᓂᒃ ᓇᓗᓇᕈᓐᓇᐃᑐᒥᒃ ᓂᐱᖃᕈᑎᖃᖃᑦᑕᓕᕐᑐᓂᒃ ᐃᓱᒫᓗᒍᑎᒥᓂᒃ ᐊᑐᕐᑕᐅᔪᓂᒃ ᐅᓪᓗᒥ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓄᑦ ᐋᕐᕿᓱᕐᓯᒪᒍᓯᐅᔪᓂᒃ. ᖃᐅᔨᓴᕐᑏᑦ ᐃᓄᐃᑦ ᐱᔪᓐᓇᐅᑎᖏᓐᓅᓕᖓᔪᓂᒃ ᐊᒻᒪᓗ ᐃᓅᓱᑦᑐᐃᑦ ᐱᔪᓐᓇᐅᑎᖏᓐᓅᓕᖓᔪᓂᒃ ᑯᐸᐃᒻᒥ ᐊᒥᓱᓂᒃ ᑖᒃᑯᓂᖓᑦᓴᐃᓇᖅ ᐃᓱᒫᓗᒍᑎᖃᕆᕗᑦ. ᐃᓱᒫᓗᒍᑎᐅᓪᓚᕆᑉᐳᖅ ᐃᒫᒃ ᐊᒥᓱᐃᑦ ᑕᒪᒃᑯᐊ ᐃᓅᓱᑦᑐᐃᑦ ᓴᐳᒻᒥᔭᐅᓂᖏᑎᒍᑦ ᖃᐅᔨᕙᓪᓚᑕᐅᒋᐊᖃᖃᑦᑕᑐᐃᑦ ᑕᐃᒪᐃᓚᕿᑎᑕᖏᑦ ᐊᒻᒪᓗ ᓯᕕᑭᑦᑑᒐᓗᐊᒥᒃ ᓯᕕᑐᓂᕐᓴᒥᓪᓘᓃᑦ ᐊᓂᕐᕋᒥᓂᑦ ᓅᑦᑎᑕᐅᖃᑦᑕᑐᐃᑦ ᐃᓅᓱᑦᑐᐃᑦ ᐱᓇᐃᓗᑕᖃᕐᓱᑎᒃ ᐃᑎᔪᒥᒃ ᐃᑯᓪᓚᖏᑦᑐᒥᓪᓗ ᓱᕐᕋᐃᓂᖃᓚᖓᒋᐊᖏᑦ ᐃᓄᐃᑦ ᐃᓅᖃᑎᒌᓐᓂᖓᓂᒃ.

ᑕᑯᒋᐊᕈᑎ ᐃᓅᓱᑦᑐᓅᓕᖓᔪᓂᒃ ᐃᓚᒌᓅᓕᖓᔪᓂᓪᓗ ᐱᒍᑦᔨᐅᑎᓂᒃ ᓄᓇᓕᓕᒫᓂ

ᓄᓇᕕᒻᒥ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᐅᑎᓂᒃ ᐱᓇᓱᐊᕐᕖᑦ ᐱᑐᑦᓯᒪᓕᕇᑦᑐᑦ ᑖᒃᑯᑐᐊᖑᙱᓚᑦ ᐱᒍᑦᔨᐅᑎᓂᒃ ᐊᑐᐃᓐᓇᖃᕐᑎᓯᔨᐅᑦᓱᑎᒃ ᐃᓅᓱᑦᑐᓄᑦ ᐃᓚᒌᓄᓪᓗ. ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ ᑲᔪᓯᑦᓯᐊᑐᓂᒃ ᐃᑲᔪᕐᓯᓯᒪᕗᖅ ᓄᐃᑎᕐᑕᐅᓂᖏᓐᓂᒃ ᐱᐊᕋᓕᕆᕖᑦ ᐸᐃᕆᑦᓯᕖᑦ ᓄᓇᕕᒻᒥ. ᑖᒃᑯᐊ ᐸᐃᕆᑦᓯᕖᑦ ᐱᕕᖃᕐᕕᐅᕗᑦ ᐱᑕᖃᕐᑎᓯᓗᑎᒃ ᐱᒋᐊᑲᐱᒍᑎᐅᑦᓱᑎᒃ ᐱᕈᕐᐸᓕᐊᑦᓯᐊᕈᑎᐅᒍᓐᓇᑐᓂᒃ ᖃᓄᐃᓘᕐᑎᓯᒍᑎᓂᒃ ᐊᒻᒪᓗ ᐃᓚᒋᔭᐅᓪᓚᕆᒍᓐᓇᓱᑎᒃ ᖃᐅᔨᔭᐅᑲᐱᖃᑦᑕᕈᑎᑦᓴᖏᓐᓂᒃ ᐱᐊᕋᐃᑦ ᐱᕈᕐᐸᓕᐊᓂᕐᒥᓂ ᐃᓱᒫᓗᓐᓇᑐᒦᒍᑎᖃᙱᒪᖔᑕ. ᑲᑎᕕᒃ ᐃᓕᓴᕐᓂᓕᕆᔨᒃᑯᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᕖᑦ ᒪᓂᒪᑎᑦᓯᓲᖑᒋᕗᑦ ᐃᑲᔪᕐᓯᒍᑎᓪᓚᕆᓐᓂᒃ ᐃᓕᓐᓂᐊᑎᒥᓂᒃ ᐃᓕᓐᓂᐊᑎᓂᒃ ᐃᑲᔪᕐᑏᑦ ᐊᓯᖏᓪᓗ ᐃᑲᔪᕐᑎᐅᓂᕐᒥᒃ ᐱᓇᓱᑦᑏᑦ ᐊᑐᕐᓱᒋᑦ.

ᓄᓇᕕᒻᒥ, ᓄᓇᓕᒻᒥ ᐋᓐᓂᐊᓯᐅᕐᑕᐅᕖᑦ ᐱᒍᑦᔨᕕᐅᑦᓱᑎᒃ ᐱᒋᐊᕐᕕᓕᒍᑎᐅᓂᕐᓴᐅᓲᑦ ᐃᓚᒌᓅᓕᖓᔪᓂᒃ ᐱᒍᑦᔨᐅᑎᓂᒃ. ᐱᒍᑦᔨᐅᑏᑦ ᐱᔭᕆᐊᑐᔫᙱᓂᕐᓴᐃᑦ ᐊᑐᐃᓐᓇᐅᑎᑕᐅᓲᑦ ᓄᓇᓕᒻᒥ ᐋᓐᓂᐊᓯᐅᕐᑎᑐᐃᓐᓇᓄᑦ, ᐃᓄᓕᕆᔩᑦ ᐃᑲᔪᕐᑎᖏᓐᓄᑦ ᐃᓄᓕᕆᓂᕐᒥᒃ ᑲᒪᔨᓄᓪᓗ. ᐃᕐᓂᓱᑦᓰᔩᑦ ᐃᕐᓂᓱᑦᑐᓂᒃ ᐱᓇᓱᐊᓲᑦ ᑕᒪᒋᓐᓂ ᑕᓯᐅᔭᕐᔪᐊᒥ ᐅᖓᕙᒥᓪᓗ ᐊᒻᒪᓗ ᑲᒪᒋᔭᖃᕐᐸᒥᑦᓱᑎᑦ ᐱᐊᕋᑦᓴᓕᓐᓂᒃ ᐱᐊᕋᕐᑖᖃᒻᒥᓂᓪᓗ. ᐅᖓᕙᒦᑦᑐᒥᒃ, ᐊᑕᐅᓯᕐᒥᒃ ᐱᐊᕋᐃᑦ ᐃᓱᒪᓕᕆᔨᖓᓂᒃ ᐱᓇᓱᐊᕐᑐᓕᒃ ᐊᒡᓚᕕᖃᕐᓱᓂ ᑰᒃᔪᐊᒦᑦᑐᒥᒃ. ᐃᑲᔪᕐᓯᔭᐅᒍᑏᑦ ᐊᑐᐃᓐᓇᐅᑎᑕᐅᓂᖏᑎᒍᑦ ᓄᓇᕕᒻᒧᑦ ᒥᑭᐅᓪ ᐃᓕᓐᓂᐊᕕᕐᔪᐊᒥ ᐱᑐᑦᓯᒪᓕᕇᑦᑐᓄᑦ (ᐃᓕᓐᓂᐊᕕᕐᔪᐊᒥ ᐱᓇᓲᑎᑦᓴᐃᑦ ᐊᑐᕐᑕᐅᔪᑦ ᒥᑭᐅᑉ ᖃᓄᐃᙱᓯᐊᕐᓂᓕᕆᔨᖏᓐᓄᑦ), ᐱᐊᕋᐃᑦ ᐃᓱᒪᓐᓂᐊᑎᖏᓐᓂᒃ ᐋᓐᓂᐊᓯᐅᕐᑎᒪᕆᓐᓂᒃ ᖃᓪᓗᓈᑦ ᓄᓇᖓᓂᒃ ᐱᓇᓱᒐᖃᕐᓱᑎᒃ ᓇᓪᓕᐅᑎᑦᑕᑐᓂᒃ ᓄᓇᓕᓕᒫᓄᑦ ᐱᓇᓱᐊᕆᐊᕐᑐᑐᖃᐃᓐᓇᖃᑦᑕᑐᖅ. ᑖᒃᑯᐊ ᐃᓱᒪᓕᕆᔩᑦ ᐋᓐᓂᐊᓯᐅᕐᑎᒪᕇᑦ ᐊᑐᐃᓐᓇᐅᕕᖃᓲᖑᒻᒥᔪᐃᑦ ᐃᑲᔪᕈᓐᓇᓱᑎᒃ ᓄᓇᓕᒻᒥ ᐱᓇᓱᑦᑎᓂᒃ ᑭᙴᒪᒋᔭᐅᓕᑐᐊᕋᒥᒃ.

ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓄᑦ ᐱᒍᑦᔨᐅᑏᑦ ᐱᓇᓱᐊᕐᑕᐅᓲᑦ ᐊᑐᓂ ᓄᓇᓕᓐᓂ ᐃᓄᓕᕆᔩᑦ ᐃᑲᔪᕐᑎᖏᓐᓄᑦ ᐃᓄᓕᕆᓂᕐᒥᓗ ᑲᒪᔨᓄᑦ. ᐱᑕᖃᙱᓗᐊᕈᑏᑦ ᐃᓂᓪᓚᑕᐅᓯᒪᓂᖏᓐᓂᑦ ᐊᑦᔨᒌᙱᑐᐃᑦ ᐱᒍᑦᔨᐅᑏᑦᐱᓇᓱᐊᕐᑕᐅᔪᐃᓪᓗ, ᐊᒻᒪᓗ ᐱᓗᐊᕐᑐᒥᒃ ᐃᓄᓕᕆᓂᕐᒥ ᐱᒍᑦᔨᐅᑏᑦ ᑐᕌᖓᔪᑦᓴᔭᐅᑦᓱᑎᒃ ᕿᑐᕐᖓᓕᓐᓄᑦ, ᐃᓚᒌᓄᑦ ᐊᒻᒪᓗ ᐃᓅᓱᑦᑐᓄᑦ ᐱᓇᐃᓗᑕᖃᓕᕐᑐᓄᑦ, ᐊᖏᔪᒥᒃ ᓱᕐᕋᐃᓯᒪᕗᑦ ᐊᑐᐃᓐᓇᐅᑎᑕᐅᒍᓐᓇᓂᖏᓐᓂᒃ ᐃᓅᓱᑦᑐᐃᑦ ᓴᐳᒻᒥᔭᐅᒍᑎᖏᓐᓄᑦ ᐱᒍᑦᔨᐅᑎᓂᒃ. ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓐᓄᑦ ᐱᓇᓱᐊᕐᑐᐃᑦ, ᐊᓪᓛᑦ, ᐊᕐᓕᐊᑐᒻᒪᕆᐊᓘᕗᑦ ᐃᑯᓪᓚᖏᑦᑐᐊᓘᓂᖏᓐᓄᑦ ᐊᒻᒪᓗ ᐊᖏᔪᓪᓗᑐᐊᓘᓂᖏᓐᓄᑦ ᐱᓇᓱᐊᕐᑕᐅᒋᐊᖃᓕᕐᓱᑎᒃ ᐅᖃᕈᑎᐅᖃᑦᑕᑐᐃᑦ.  ᑕᐃᒪᐃᓕᖓᓪᓗᑐᕐᑎᓗᒋᑦ, ᐃᓚᒋᔭᐅᒻᒥᑎᓪᓗᒍ ᐃᓄᐃᑦ ᐅᑉᐱᕈᓱᑦᓯᐊᕈᓐᓇᐃᓕᕐᓯᒪᓂᖓ ᐱᓇᓱᕝᕕᓂᒃ, ᑐᑭᓯᒍᑎᐅᑦᓯᐊᑐᐃᓐᓇᕈᓐᓇᐳᑦ ᐊᑯᓂᐅᙱᑐᖅ ᐊᓯᑦᔨᒍᐊᕐᑑᖃᑦᑕᓂᖏᓐᓂᒃ ᐃᓄᑐᐃᓐᓇᐃᑦ ᐊᒻᒪᓗ ᖃᓪᓗᓈᑦ ᐱᓇᓱᑏᑦ ᑕᐃᒪᐃᑦᑐᓂᒃ ᐱᓇᓱᐊᕐᑐᑦ.

ᐃᕕᕐᑎᓯᓂᕐᒧᑦ ᐱᒍᑦᔨᐅᑏᑦ ᐃᓅᓱᑦᑐᓄᑦ ᐃᓚᐅᑦᓯᐊᕈᓐᓇᖏᓐᓂᒥᒃ ᐱᓇᐃᓗᑕᓕᓐᓄᑦ ᑐᕌᖓᑦᓱᑎᒃ ᐊᑐᐃᓐᓇᐅᕗᑦ ᓯᑕᒪᐅᔪᖏᒐᕐᑐᓂᑦ ᐃᕕᕐᑎᓯᓂᕐᒧᑦ ᐃᓂᖃᕐᕕᓂᒃ ᓄᓇᕕᒻᒦᑐᓂᒃ ᖃᓪᓗᓈᑦ ᓄᓇᖓᓃᑐᓂᓪᓗ. ᒪᕐᕉᓂᒃ ᐱᓪᓗᑯᒋᐊᓕᑦᑎᒍᑦ ᐱᓇᓱᐊᕐᕕᑕᖃᕐᖁᖅ ᐱᐊᕋᕐᓄᑦ ᐅᑭᐅᓕᓐᓄᑦ 6-ᓂᑦ 12-ᓄᑦ ᑐᕌᖓᔪᓂᒃ: ᑰᒃᔪᐊᒥ ᑰᒃᔪᐊᕌᐱᒻᒥᓗ. ᒪᕐᕉᓂᒃ ᐃᓅᓱᑦᑐᓄᑦ ᓇᔪᒐᐅᑦᓱᑎᒃ ᐃᑲᔪᕐᑕᐅᕕᖃᕐᖁᖅ: ᑰᒃᔪᐊᒥ ᐳᕕᕐᓂᑐᒥᓪᓗ. ᐃᕕᕐᑎᓯᓂᕐᒧᑦ ᐱᓇᓱᐊᕐᕕᒥᒃ ᐃᓂᖃᕐᒥᔪᖅ ᓱᕈᓯᓄᑦ ᓴᓪᓗᓃᑦᑐᒥᒃ. ᐃᕕᕐᑎᓯᓂᕐᒧᑦ ᐱᓇᓱᐊᕐᕕᒃ ᓂᕕᐊᕐᓯᐊᓅᓕᖓᑦᓱᓂ ᒪᓐᑐᕆᐊᓪᒦᑦᑐᖅ ᓅᓛᕋᓗᐊᕐᓱᓂ ᐃᓄᒃᔪᐊᒧᑦ 2015-ᖑᓕᕐᐸᑦ. ᐃᑎᑐᐃᓐᓇᑕᐅᒍᓐᓇᖏᑦᑐᖅ ᐃᓂᒃ ᐃᓅᓱᑦᑐᓄᑦ ᐱᖁᔭᑎᒍᑦ ᐱᓂᕐᓗᓯᒪᔪᓄᑦ ᐊᑐᕐᑕᐅᒋᕗᖅ ᒪᓐᑐᕆᐊᓪ ᓯᓚᑖᓃᑦᓱᓂ.

ᐃᓱᓕᒋᐊᕈᑎ

ᐊᐅᓚᑦᔭᓚᕿᐅᑎᐅᔪᑦ ᕿᑐᕐᖓᓖᑦ ᐃᓱᒪᒨᓕᖓᔪᓂᒃ ᐱᓇᐃᓗᑕᖃᕐᓂᑯᖏᓐᓄᑦ ᓱᒋᐊᕆᒍᑎᓂᑐᐃᓐᓇᓂᒃ ᐱᑕᖃᕆᐊᖃᙱᓚᑦ. ᑭᙴᒪᓇᕐᑐᐃᑦ ᐱᒍᑦᔨᐅᑏᑦ ᓄᐃᑎᕐᑕᐅᒋᐊᖃᕐᐳᑦ ᐃᑲᔪᕐᓯᔭᐅᒍᓐᓇᓯᖁᓗᒋᑦ ᕿᑐᕐᖓᓕᕆᒍᓐᓇᓂᕐᒥᓂᒃ ᐱᕙᓪᓕᐅᒥᒍᑎᑦᓴᓂᒃ ᐊᒻᒪᓗ ᐊᓯᑦᔩᕙᓪᓕᐊᒍᑎᑦᓴᖏᓐᓂᒃ ᐃᑯᓪᓚᑎᑦᓯᒍᑎᒋᓗᒋᑦ ᐅᐃᕆᓯᒪᐅᑎᒥᓄᑦ ᐱᓗᑲᓐᓂᖏᑦᑕ ᐃᓱᒪᒨᓕᖓᔪᐃᓪᓘᓃᑦ ᐱᓇᐃᓗᑕᖏᑦᑕ ᓱᕐᕋᐃᓂᖏᓐᓂᒃ ᐃᓅᓯᕐᒥᓂᒃ ᕿᑐᕐᖓᒥᑕᓗ ᐃᓅᓯᖏᓐᓂᒃ. ᑕᒪᒃᑯᐊ ᐱᒍᑦᔨᐅᑏᑦ ᐊᒥᓱᕕᓐᓂᓴᐅᑦᓱᑎᒃ ᐱᑕᖃᙱᓗᐊᕐᐸᑐᑦ, ᑐᕌᓚᕿᒍᑎᐅᑦᓱᑎᒃ ᖃᓄᐃᓕᖓᓂᕐᒧᑦ ᐃᑲᔪᓂᕐᓗᖔᕈᓐᓇᓱᑎᓪᓗ ᕿᑐᕐᖓᓖᑦ ᕿᑐᕐᖓᖏᓪᓗ ᓱᒋᐊᓪᓚᕕᖃᙱᑑᔪᕆᓂᕐᒥᒃ ᐃᑉᐱᓂᐊᕐᓂᖏᓐᓄᑦ.

ᑎᒥᐅᔪᓄᑦ ᐊᒻᒪᓗ ᓄᓇᕕᒻᒥᐅᓄᑦ ᐃᓚᐅᕕᖃᕐᑐᓄᑦ ᐃᓗᓯᓕᕆᓂᕐᒥ ᐱᒍᑦᔨᐅᑎᓂ ᕿᒥᕐᕈᓂᕐᒧᑦ, ᐅᑉᐱᕆᔭᐅᕗᖅ ᐃᒫᒃ ᓵᙵᔭᐅᑦᓯᐊᕋᔭᕐᐸᑕ ᑲᑐᑦᔮᕆᓗᒋᑦ ᐃᓚᒌᓄᑦ, ᐃᓱᒪᖃᑦᓯᐊᓂᕐᒧᑦ ᐅᐃᕆᓯᒪᐅᑎᓕᓐᓄᓗ ᐱᒍᑦᔨᐅᑏᑦ ᓄᐃᑦᓯᒐᔭᕆᐊᖏᑦ ᐃᓚᖏᓐᓂᒃ ᐋᕐᕿᓱᐃᒍᑎᐅᒐᔭᕐᑐᓂᒃ ᑭᙴᒪᒋᔭᐅᔪᓂᒃ ᓈᒻᒪᓈᕐᑎᓗᒋᑦ ᐱᔭᕆᐊᑐᔫᑦᓱᑎᒃ ᐃᓱᒪᓐᓂᐊᕆᓂᕐᒨᓕᖓᔪᓂᒃ ᐃᓅᖃᑎᒌᓅᓕᖓᔪᓂᓪᓗ ᐃᓱᒫᓗᓐᓇᓕᕐᑐᓂᒃ ᓄᓇᕕᒻᒥ.